政情：八網難逃：自行升呢 邵家輝致歉
呢屆立法會仲有一個禮拜左右就結束，唔少議員都會為過去四年嘅議會工作做總結，好似批發及零售界議員邵家輝咁，日前都出咗呢屆任期嘅工作報告，仲為「升呢」致歉添！
委員誤寫成副主席
邵家輝喺社交平台貼文，話佢嘅工作報告面世，仲陸續寄出添！但隨即又話有更正喎。點解呢？佢話由於呢份工作報告製作時間緊迫，印製後先發現喺會議出席紀錄上有「手民之誤」，喺「公務員及資助機構員工事務委員會」同「資訊科技及廣播事務委員會」內，寫咗佢係副主席，實際上只係委員，為此特意澄清，仲話向有關嘅副主席同事致歉喎。果然夠認真！