政情：黃定光暗示唔競逐連任
先後有議員表態唔競逐連任，而進出口界議員黃定光（象哥）為所屬政黨拍咗一段短片，係佢接受該黨主席嘅訪問，短片放上社交平台，仲貼文話佢即將退下火線，暗示象哥唔競逐連任嘞！
最難忘審竊聽例 通兩晚頂
象哥由○四年開始循進出口界當選議員，一做十六年。佢接受該黨主席李慧琼專訪時，仲一齊想當年。經歷過議會嘅風風雨雨，象哥回望番原來最深刻嘅經歷係○四年審議竊聽條例，佢話當時日以繼夜咁工作，更加連續兩晚通頂，為嘅就係趕上限期審議條例，經過一番努力最終成功通過條例。象哥講起都心有餘悸，話如果唔係成功通過條例，當時所有警方嘅調查同執法都會變成非法罪行。
總結多年議會生涯，佢話立法會工作係要令社會進步，唔係要打擊政府管治，而係要改善管治。佢認為作為議員要抱有呢顆心做好工作，令香港不斷前進。
最後，李慧琼送上以象哥全名作嘅藏頭詩，讚象哥為民為國。象哥收到呢份禮物，話係對佢嘅鼓勵同鞭策。