受到疫情嘅影響，令本來已人手緊絀嘅公立醫院更加踢晒腳，病人覆診期亦要延後，仲要特別安排攞藥添！為免耽誤病情，有公院就試用Zoom視像診症，但名額得嗰幾個，面對眾多覆診病人，呢個安排唔知可唔可以紓緩條隊龍呢？雖然最近疫情稍為緩和，但近日又爆出兩宗本地感染個案，唔知仲會唔會爆多幾單，咁公院覆診幾時先回復正常嘅安排？醫管局行政總裁高拔陞真係要諗掂佢，唔可以令病人因延醫而令病情惡化。
