中環出更：亂世多紛爭 黃慧英憑歌重拾童真
新冠肺炎疫情困擾香港超過半年，雖然社會嘅衞生意識大大提高，但其實心靈健康同樣重要！香港教育大學文化與創意藝術學系助理教授黃慧英話，喺紛亂嘅世界入面，更加要重拾好似小朋友咁純真嘅清心，好好地活在當下。
面對壓力，每個人都有唔同嘅處理方法。黃慧英係歌唱家，平時最鍾意自彈自唱。佢話每一次唱歌嘅時間，都可以令自己專注喺音樂上面，又可以重新細味啲歌詞，心靈都會好似食飽咗咁重新得到養分。佢覺得喺教育嘅過程入面，老師同時都向學生學習，「小朋友係我哋嘅學習對象」。佢話都市人係時候回歸基本，由呼吸開始，聆聽自己嘅內心。
虎豹樂圃執行董事李明哲都鍾意用音樂嚟放鬆自己，身為鋼琴家嘅佢話，疫情令佢有更多時間去彈自己鍾意嘅歌。講到虎豹樂圃，令人聯想起喺虎豹別墅嘅「十王殿」壁畫，畫咗死後世界嘅因果懲罰，當中帶出唔少做人處世嘅價值觀。李認為做一個好嘅市民，盡社會責任好重要，每個人喺社會上都有唔同嘅角色，需要大家一齊合作。同場嘅社企Encompass行政總裁兼創辦人Benita就認為現今社會最需要「包容」，Benita指社會上有好多種群體同聲音，大家不妨多溝通，消除誤解。
何天虹用跳舞減壓
唔單止玩音樂可以紓緩情緒，跳舞都得o架！香港大學社會科學學院副院長何天虹就會用跳舞嚟減壓，佢平時都會喺自己嘅工作室播下音樂跳下舞，感受身體嘅節奏。佢話依家香港社會充滿怨氣，最缺乏嘅嘢就係「欣賞」喇！無論係對人定對事，如果大家可以欣賞多啲，世界會更加美好。佢認為可以透過藝術教育，慢慢培育下一代嘅美感，多啲感受事物美好嘅一面，自己都會開心啲啦！
卓妮