中環出更：幾多區議員撐「光時」 沈豪傑促政府做問卷調查
政府早前發聲明指「光時」八個字嘅口號含有港獨或分裂國家之意，更有官員話違反《港區國安法》嘅人士，可理解為終身喪失參選同出任公職嘅權利。近日有區議員喺網上發文，叫政府向全港十八區區議員發出問卷，了解佢哋係咪仍然支持嗰八個字嘅口號，以正視聽喎。
引網民激辯
本身係律師嘅元朗區議員沈豪傑，日前喺Facebook（Fb）社交網站貼文，話舊年區議會選舉，有唔少地區實幹嘅區議員，向佢表示非常不忿，因為有啲完全冇地區實政嘅候選人，跑出來高喊一句八個字嘅口號，就贏咗。有唔少候選人，更加將口號印喺政綱同宣傳品內，當然亦有唔少出喺Fb貼文。
沈豪傑仲話，雖然港區國安法並無追溯權，但政府已發聲明，口號有顛覆同分裂國家嘅含意。佢話為求公平，建議政府做問卷調查，問晒全港所有區議員係咪仍然支持嗰個口號。
政府會唔會聽佢講做問卷調查？睇嚟都好渺茫嘞。但貼文一出，就引起網民激辯，部分網民仲互罵添！沈豪傑就留言話：「嘩！咁多人對號入座過嚟熱烈討論，真係受寵若驚。」
卓妮