中環出更：睹流浪狗瞓賽車場 梅廣亮唔做車手搞社企
做生意搵舖位難，社企要搵會址都唔容易o架。非牟利團體「果園社企」成立多年，不過近日先至搵到新界一所建於六十年代嘅空置校舍為會址，並於上周六進行動土禮，之後會活化復修成類似社區中心嘅地方。創辦人梅廣亮（Alex）就話，經營社企當然係想解決社會上嘅痛點，然而有賴身邊嘅朋友同埋慈善團體間互相幫忙同支持，佢哋至得以站穩陣腳，着手開展其服務大計。
夢想成為職業車手嘅Alex，過去除咗到歐洲學賽車，十年前又喺香港搞咗個賽車場，但何解後來會成立着眼於動物權益嘅社企呢？Alex話賽車場曾因事故而關閉，幾年後打算重開，發現有隻流浪狗住咗喺入面，當刻嘅畫面令佢好大感觸，發覺原來另有事物較賽車更重要，於是人生目標就由賽車手轉變為救助流浪貓狗喇。Alex話做社企一啲都唔易，當初得一腔熱誠但乜都唔識，連申請資助、搵地方做會址等嘅程序同手續都搞錯晒，幸好身邊有一班熱心嘅朋友仗義幫忙。至於作為會址嘅舊校舍，活化後會舉辦工作坊、有機耕種等活動畀大人細路一齊參與。
黃偉傑搵長者探訪更生青少年
有份出席動土禮嘅天乙慈愛基金會創會會長黃偉傑（Kit），就以「世紀大騙局」嚟形容成立社服組織嘅經過。佢話組織草創之初，一幫創會成員影完相 「打晒卡」之後就走晒，留低個會畀佢獨自孭起會長同義工嘅職責。Kit喺過往嘅探訪活動中，留意到好多長者保養得好好，於是佢就發揮逆向思維，搵長者做義工探訪更生青少年，分享吓人生經驗咁話。不過年輕人要加入佢哋嘅義工行列，當然係無任歡迎喇。
有份出席活動嘅仲有絲打便當兩位創辦人周敏儀（Vivian）同鍾采霖（Vince），佢哋都同意社企間應該互相幫助，話當初成立絲打便當都係多得Alex仗義幫忙，搵車隊幫手送便當，所以今日點都要嚟賀一賀佢。
卓妮