政情:田二少開財會太興奮 倒瀉咖啡一褲都係

好多人都鍾意喺朝早飲番杯咖啡提吓神,連議員都唔例外,甚至會一路開會一路飲添。不過尋日議員田北辰(田二少)喺開財務委員會時,唔小心倒瀉咗杯咖啡,除咗文件濕晒,仲搞到自己條褲同手都有咖啡添,認真論盡喇!

尋日一大朝早就開財委會,喺開咗大約一個鐘左右,當時正喺度討論緊洪水橋新發展區嘅四個工程項目撥款,唔知係咪田二少太關注新界西北嘅交通配套問題,喺發言尾聲時就唔小心掃跌枱面杯咖啡,放喺枱面嘅文件就即時濕晒,連帶佢條褲同埋手都污糟埋。

晏晝已換過條褲

田二少即刻彈起身,拎紙巾清理褲上同埋手上嘅咖啡漬,而立法會嘅工作人員見狀,就即刻拎毛巾同紙巾等去幫手清潔。之後田二少仲自嘲,話自己發言太興奮,所以先會倒瀉咖啡,搞到坐喺佢後面嘅議員梁志祥都忍唔住笑。田二少本來朝早係着啡色嘅褲,下午就變咗係淺藍色嘅褲,唔知係早有預備,定係臨時返屋企換呢?

第一手消息請下載on.cc東網iPhone/iPad/Android/Windows Phone Apps