政情：缺席內會齋擺示威牌 泛民又累保安執手尾
立法會內務委員會嘅選主席風波歷時七個月，選完之後嘅每次會議，民主派議員都一律集體杯葛，除咗唔出席會議，仲喺每次開會前夕，喺各自嘅枱面擺放示威標語牌宣示立場，喺尋日嘅內委會會議上，佢哋又例牌放滿示威標語牌，惹起在席建制派強烈不滿，要求移走標語。
建制要求直接阻止擺放
喺會議一開始，議員葛珮帆（EQ）就率先提出規程問題，話見到啲民主派議員唔嚟開會，但又喺座位上擺咗啲同議程無關嘅示威標語牌，要求主席收晒啲示威標語牌，同埋譴責佢哋唔開會。EQ嘅黨友、議員陳恒鑌就話，成日入嚟會議室都會見到依啲無關緊要嘅牌，希望下次直接阻止佢哋擺標語牌，費事要再勞師動眾同埋麻煩保安去執。
內委會主席李慧琼就話示威標語內容同會議無關，而且見唔到有議員坐喺有示威標語牌嘅位置上，要求保安移走。喺保安移走期間，議員何俊賢就忍唔住話李慧琼表達唔夠精準，就算有冇人坐喺位，總之同會議無關嘅示威標語牌都要收走，建議李下次可以唔使講喎。