中環出更:泛民斥聯署信石沉大海 葉劉:唔知做乜咁心急

研究幼稚園、中小學教科書及教材編製小組委員會開咗三次會都未選到主席,教育事務委員會主席葉劉淑儀(葉劉)就會喺下周一召開特別會議討論,但就引起民主派議員強烈不滿,連日嚟多次去信反對,但似乎冇得到任何回覆喎,佢哋尋日又再發出聯署信要求葉劉解釋,但葉劉就話之後喺會上一次過覆仲好啦!

話下周開會先回應

民主派十三位議員尋日再發出聯署信,提到話佢哋由十七日至十九日曾三度去信反對開特別會議,事隔一周都冇任何回覆,好似石沉大海咁,嚴正譴責呢種唔負責任嘅態度,仲話如果葉劉對自己言論有信心,大可以直接面對質疑,而唔係不斷迴避,要求對方可以喺下星期開會前畀到回應。

但葉劉就笑住話,其實收到唔止三封信,係六封呀,但佢就唔知泛民做乜嘢咁心急喎,又話佢作為主席,有權利決定幾時回覆,佢會同法律顧問傾,下周一開會先回應都得,咁仲好添呀,有晒會議紀錄咁話。

卓妮

第一手消息請下載on.cc東網iPhone/iPad/Android/Windows Phone Apps