政情：選中大校友評議會主席 張秀賢遲交表遭DQ
香港中文大學校友評議會將會喺下月十八日改選，到時投票選出新主席同兩名常委，主席將成為當然中大校董，而常委之間亦可互選出兩名校董。不過，有份參選主席嘅元朗區區議員張秀賢（Tommy），尋日就收到通知，由於佢遲交提名表格，因而不符合規定，所以不被接納成為合資格候選人，即係被DQ（取消資格）。
話自己唔係好恨
Tommy喺社交平台貼文話，佢好急先至遞交提名表格，講明自己唔係好恨選，真係預咗無得選喎，又話「入唔到閘」唔關政治事嘅。咁其實佢交表有幾急呢？Tommy留言話最後廿分鐘，因為睇唔過眼某啲嘢先去參選，所以真係好心急，又話希望下次唔使又係佢選喎。現時兩名競逐主席嘅人選分別係郭碧蓮同埋現屆常委楊于銘。