政情：播粗俗歌 放酒類廣告 港台兩節目遭警告
廣播處長梁家榮領導嘅香港電台未有整治內部運作及改善節目質素前，再度遭觀眾投訴！兩宗投訴個案，分別涉及電台節目播放一首歌曲歌詞含有粗俗用語，仲有喺合家欣賞時段內播放嘅電視節目含有某酒精品牌嘅植入式廣告。通訊事務管理局裁定兩宗投訴成立，並就涉播放粗俗用語歌曲嘅投訴向港台發出警告。
即下架認衰
港台就話接受通訊局裁決，有關節目已下架，主持已經喺節目道歉，管理層會加強訓示員工，務必恪守相關廣播守則。
被投訴嘅港台節目，包括去年十二月十五日喺港台第三台播放嘅電台節目《Simon Willson》嘅投訴，呢個節目當日下午二時四十分播放嘅一首歌曲，歌詞含有粗俗用語。通訊局裁定投訴成立，決定向港台發出警告，敦促嚴格遵守《電台節目守則》內相關條文。
至於另一宗投訴發生於同年九月三十日，港台電視三十三及三十三A台播放嘅電視節目《天氣預報》有關，投訴提到呢一個喺合家欣賞時段內播放嘅節目，含有某個酒精品牌嘅植入式廣告。通訊局認為投訴成立，考慮到投訴情況後，雖然決定唔會懲處港台，但提醒港台要採取必要措施，確保日後遵守《電視廣告守則》相關條文。