政情：積壓項目涉款逾920億 陳健波加開財會最後衝刺

根據立法會文件，波哥打算在下月十三日及十四日加開會議，兩日會議時間合共達十二個半小時，希望各委員喺下周二（30日）前表明可否出席。其實加兩次會議並唔足以處理咁多項目，據悉財委會在立法會七月中休會前，包括今次加開嘅會議在內，將會喺十一日內召開額外十八節會議，合共時間長達五十八小時。

籲反對派「良心發現」勿拉布

眾所周知，民主派議員在議會「拉布」已成為常態，經常被批評拖延審議時間。波哥就大鬧反對派議員嘥時間，成日重複問同一個問題，意圖影響議會正常進行，阻礙民生項目「落地」。咁點解決呢？波哥就話希望反對派議員「良心發現」，唔好重複糾纏問題，仲話議員真係覺得相關議題唔清晰，可以搵官員上辦公室慢慢傾，或以書面諮詢形式叫官員作答，但就唔好浪費議會嘅公共時間。

審議時間劃線 禁無限發言

如果反對派議員堅持「拉布」，波哥話會喺計算討論該項目所需時間，就會堅持就審議時間「劃線」，禁止議員「無限發言」。至於會期結束前過到幾多個項目？波哥話，如果反對派唔「玩嘢」，應該過到四十幾項；相反如果反對派議員堅持「與民為敵」，繼續「拉布」，到最後可能連一半嘅項目都過唔到。

其實政府目前有超過六十個獨立或已通過小組委員會嘅撥款申請有待財委會審批，其中有十九項申請已經納入本月廿六日財委會議程，總值約五百六十四億元。而比較重要嘅項目就包括咗四個醫院項目，總值二百二十九億六千萬元；涉款約廿二億五千萬元嘅洪水橋及廈村新發展區前期工程；涉款約四十二億七千萬元嘅啟德發展計劃新增嘅區域供冷系統；以及涉款二百億元購置處所提供福利服務等。