中環出更：林鄭倒米 嫌銅芯口罩洗得多變鬆
政府早前向市民派發銅芯抗疫口罩，坊間一直都有唔少聲音批評銅芯口罩防禦力不足，清洗又麻煩。點知就連理應帶頭支持自家出品嘅特首林鄭月娥都倒自己米，話銅芯口罩麻麻哋，唔知係咪因為洗得多鬆咗咁話喎！
見記者時兩度露出鼻窿
林鄭尋日朝早出席行政會議前見記者，睇得出佢戴嘅銅芯口罩有啲鬆，一直都就嚟跌低過個鼻，仲曾經兩度露出鼻窿。搞到佢都忍唔住喺發言期間同記者講：「今日個口罩麻麻哋，可能洗得多鬆咗啦」，之後仲伸手整個口罩同除口罩飲水。
唔單止唔撐自己嘅銅芯口罩，睇嚟林鄭對禁聚令限期都唔係好清楚。有記者問佢七月一日前禁聚令會唔會結束，林鄭就有啲猶豫咁話，禁聚令有效期應該係去到七月二日嘅，仲一度向隨扈詢問係咪七月二日到期，然後再話「係囉禁聚令係兩個星期十四日嘅」。
卓妮