中環出更：參觀裁判法院 龐愛蘭體驗港深度遊
一般人若非打官司，否則都唔會踏足法庭半步。不過香港藥學會會長龐愛蘭嘅Facebook，日前就有一輯佢置身於法庭嘅相片，其中一張更見到佢佇足犯人欄內，到底發生乜嘢事要入法庭呢？生不入官門呀！
其實龐愛蘭早前係應朋友邀請，參觀經過復修及活化，今日成為香港青年協會領袖學院嘅前粉嶺裁判法院。佢話呢幢建築物看似簡單，其實內裏嘅設計非常巧妙。雖然好多人都知道法院裏面係有犯人通道，法官亦有其專用嘅走廊，但若非置身其中，就難以體會到當時建築師所花嘅心思，至於拘留室、會計部嘅設置都令佢大開眼界。講番今次參觀，龐覺得旅遊唔一定係吃喝玩樂，反而涉及文化同歷史典故嘅深度遊，更加令人嚮往。其實香港舊建築都有唔少，若果妥為運用都可以成為另一種旅遊資源。
鄧達智好鍾意睇古蹟
時裝設計師鄧達智（William）出門旅遊，都會嘗試了解當地嘅文化風俗，所以佢好鍾意睇古蹟同下榻於傳統嘅旅店。佢話香港旅遊除咗上山頂睇維港，亦不乏可供深度遊嘅路線，譬如屏山文物徑沿途就散布幾百年歷史嘅祠堂、書室、圍村、及前身係元朗警署嘅屏山鄧族文物館，平日都吸引唔少喜歡深度遊嘅遊客到訪。William話因為當區居民視屏山為「蟹地」，於是建築物就以青同灰色居多，而紅色就成為忌用嘅顏色。
十八鄉鄉事委員會前主席梁福元，指政府雖有意發展本地旅遊以推動本地經濟，但對於鄉郊方面資源投放就好少，簡直完全被忽視，仲大呻部分鄉郊地方甚至連光纖都未有。梁話反正香港周邊國家仲未放寬封關措施，而好多城市人都會趁假日去鄉郊遊玩，其實稍微畀啲資源發展，有可能激發出鄉郊嘅旅遊潛力。
卓妮