政情：公民講場：「疫境」家暴急升 社區輔導竟暫停

正所謂相見好、同住難，有社服機構指今年首季嘅家暴求助數字激增八成，唔少個案都涉及市民居家避疫，朝夕相對矛盾叢生，易起摩擦同衝突。正當家暴受害人最需要尋求協助之時，唔少社區或輔導服務竟因疫情而暫停，亦有受害人一直向學校社工尋求幫助，但停課情況下無法約見社工。防疫措施無疑係重要，但家暴求助都亦不可忽視。社會福利署署長梁松泰係咪要幫手諗吓計呢？畢竟家庭悲劇冇人想見到。