政情：垃圾徵費勢難產 黃錦星入晒議員數

黃錦星出席節目時就話，過去一年因為社會情況，令唔少法案嘅立法進度受影響，立法會進程較慢，對於垃圾徵費條例草案委員會有過半數委員同意終止審議，佢會同議會再討論情況，又話如果有議員對法案有比較堅持嘅意見，對立法進程影響會好大，但就強調呢個係議會嘅決定，當局都只好盡量配合議會工作喎。

佢又提到，即使立法工作暫停，減廢回收嘅工作係唔會停，會多管齊下加強減廢回收工作，包括將「家居廚餘回收變電」計劃擴展到資助住宅屋苑並加裝智能廚餘回收箱，仲話當局已喺東區推行廢塑膠回收先導計劃，推廣乾淨回收，覆蓋區內一半屋苑，乾淨回收率超過九成，現時正喺社區擴展回收網絡同新增回收點，涵蓋八種回收物料，未來亦都會加強乾淨回收教育等。

被指有責任吸納議員意見

垃圾徵費「難產」，黃錦星將責任推畀一班議員，高佬賢就覺得有關講法完全不負責任，佢認為有議員阻礙審議進度係事實，好似內會都拖延大半年，但議員對法案不滿同樣係事實，直言黃局長有責任充分吸納議員意見，了解議員對草案嘅關注，再喺啱嘅時間，遞交一個最好嘅草案，冇咁大爭議先可以做到盡快通過，先至有理想效果。

法例通過 執法仍束手無策

高佬賢又話，過去唔少草案就算通過咗，但礙於執行力不足以致作用非常有限，譬如停車熄匙法例、建築廢物處置收費及禁止拖網捕魚法例等，全部喺執行上都唔理想，政府根本就係束手無策。當周街都有人違法，令到守法嘅人都變得唔想守法。政府可能會話要先撥款，之後先至可以做到，但其實之前都有畀錢，又唔見做得好，鬧爆政府再用呢種官僚態度做事，事情唔會有改善，又希望黃錦星用心聆聽議員意見，發表啲全面、公道嘅言論咁話。