中環出更：580億工程未審議 盧偉國籲泛民勿死拖
立法會會期將七月中完結，所有喺今屆未能完成審議嘅項目，都需要喺新一屆立法會組成後推倒重來。工程界議員盧偉國尋日喺Facebook貼文，話工務小組喺上年度同今個年度交上財務委員會嘅新工程項目中，有涉及五百八十億元嘅多個項目仍未被處理。
盧偉國話相關項目包括醫院管理局「十年醫院發展計劃」下公立醫院重建或擴建工程、洪水橋／廈村新發展區項目、啟德發展區區域供冷系統，以及為三間有提供醫療相關學科嘅大學提供設備提升等，而呢啲項目都同民生息息相關。
冀冇爭議性項目先通過
佢又話一旦呢啲項目唔能夠喺七月中獲財務委員會通過，喺下一屆立法會就要從頭嚟過，重新經由相關事務委員會同工務小組再次審議，先至可以上番財委會，分分鐘會再拖幾年時間。佢呼籲民主派議員應該要以民生及香港市民利益行先，形容大家之前辛辛苦苦行到最後一步，希望能夠將冇爭議性嘅項目優先通過。
卓妮