中環出更：探望長者 黃國權帶埋醫生 理髮師 維修工
隨住疫情放緩，禁聚令亦得以放寬，差唔多三個月冇舉辦慈善活動嘅愛心飯團創辦人黃國權（Danny），尋日聯同一班義工探訪獨居長者，除咗送上牙膏、衣物、茶包等必需品之外，更加係第一次邀請醫生、理髮師同家居維修義工協會嘅師傅參與活動，希望了解長者生活上嘅需要，解決各種疑難。
慈善活動恢復舉辦，Danny話引頸以待，因為自從活動今年三月暫停後，不時都有老人家喺佢公司門口，問幾時有得派飯，而佢終於都可以實牙實齒咁話，將於周一開始正式恢復派飯。至於今次上門探訪長者，就用咗兩個星期時間籌備，並得到五十幾位義工參與。
嚴偉貞：老人家好想義工留耐啲
家訪義工會分為十五個小隊，分別前往太子、深水埗、觀塘等地區嘅舊樓，上門探訪獨居長者。隨隊嘅醫生會問吓長者健康有咩問題，有需要會轉介同跟進，而如果有長者需要剪頭髮嘅話，理髮師會即場同佢剪，至於維修義工就會幫手睇吓長者嘅屋企有乜地方要維修，簡單工程會即場處理，但比較大嘅工程就要另約時間上門修理。
愛心飯團名譽會長嚴偉貞、榮譽會長劉健儀、仲有家居維修義工協會創辦人陳漢文亦係今次家訪義工之一。嚴偉貞話啲老人家見到佢哋都好開心，好想啲義工留耐少少，唔捨得佢哋走，又認為老人家的確要多啲人關心。以往約莫兩個月就會剪一次頭髮嘅嚴偉貞，受到疫情影響，已經有半年無幫襯髮型屋，依家會用頭箍紮起頭髮，不過佢話就快會去剪頭髮，覺得一頭短髮會清爽啲。
陳漢文話疫情爆發以來，長者向佢哋求助嘅個案上升三成，主要係石屎或油漆剝落、漏水同鋼筋外露等，呢啲工程唔算難處理，通常幾個鐘就搞掂。但佢話有部分非牟利機構擔心義工上門，會將外間嘅病毒帶往長者寓所，所以疫情肆虐期間，都唔主張上門維修。
卓妮