政情：區會批錢雞碎咁多 康文署整裝飾自己埋單
政府同區議會嘅關係已「劍拔弩張」。中西區區議會地區工程及設施管理委員會尋日召開會議，審議有關康樂及文化事務署申請合共五十七萬港元撥款，用嚟喺區內嘅康文署場所加設節日裝飾，不過就畀班區議員「反彈」，要求康文署自行負責番相關費用喎。
「拎錢時就一分子」
話說康文署代表喺開會嘅時候話區議會都係地區嘅一分子，希望區議員支持署方提出嘅園藝美化工程。點知就有區議員大鬧話拎錢嘅時候就係一分子，要政府幫手整工程嘅時候就諸多推搪，又話部分地區嘅盆栽價格高昂，認為根本唔合理。雖然康文署代表落足力咁推銷，但最終區議會都只係撥出極少資金，其餘資金就要求康文署自行負責。
另外亦有區議員質疑區議會撥款畀康文署，但相關設施或盆栽只得康文署嘅標誌，大呻話「又話一分子，但淨係貼自己（康文署）Logo（標誌）」。而康文署代表反駁話要追加撥款，否則淨係夠錢加印個貼紙，最後區議會都只係批出部分撥款，睇怕康文署都有排煩啦。
近來有部分區議會都有人事變動，中西區區議會嘅民政事務專員黃何詠詩亦將會調任，原任大學教育資助委員會副秘書長嘅梁子琪會接任，尋日仲喺會議中現身添，唔知係咪嚟同區議員打定招呼呢。