政情：港府超支懶解釋 伸手就攞367億

議員引述本報 促應先予醫療基層

尋日立法會續會討論涉款達三百六十七億五千萬港元嘅《追加撥款（二○一八至二○一九年度）條例草案》，其中議員鄺俊宇狠批，話筆撥款「畀你係人情，唔畀你係道理」，佢仲引述《東方日報》喺今年四月十四日嘅頭版報道「公院不勝負荷，疫下手術再拖，痛症病人等到癱」，批評喺疫情下公營醫療系統資源不足，認為政府應該將錢撥畀醫療系統、老人同埋基層。至於政府部門花費超出原先預算嘅錢，佢認為政府有責任自行承擔囉。

早前民主派議員因為警隊開支預算而反對財政預算案嘅撥款，不過鄺俊宇就話唔支持追加撥款並唔係針對警隊，而係因為政府應該將金錢留畀有需要嘅社群。佢仲認為，政府部門應該要派代表去立法會解釋超支問題，咁議員就可以向市民解釋撥款嘅利弊喇。

建制批教育使錢多 教出「掟磚生」

唔止民主派議員批評，喺建制派議員方面，議員何君堯就話追加撥款當中包括教育方面同大學撥款嘅開支，但本港大學每年申請大量撥款，最後培訓出「掟磚」嘅學生，認為政府唔應該無止境咁喺教育方面投放金錢，又話香港社會冇虧欠年輕人喎。

出席會議嘅財經事務及庫務局局長許正宇就解釋，條例草案當中有約二百億港元早已獲財委會批准，有啲政府部門因為撥款用得其所，同埋出現盈餘，所以唔使申請追加撥款。唔知佢咁講係咪暗示有啲部門「亂咁使錢」，所以需要追加撥款呢？無論如何，最終條例草案以三十六票贊成，十九票反對通過三讀。

另外會上亦三讀通過《二○一九年版權（修訂）條例草案》，同埋《二○一九年聖約翰學院（修訂）條例草案》，主席梁君彥就話覺得傾唔晒啲議程，所以提早宣布休會，唔知係咪想「偷懶」呢？