政情：收陰司紙痰漬口罩 李予信：嚴重滋擾
東區區議員李予信（阿信）尋日喺Facebook貼文，話收到一封滋擾信件，裏面唔單止有陰司紙同有關過去一年社會事件嘅剪報，仲有一個沾有相信係痰漬嘅口罩。佢又話以前都收過唔少古怪嘅信件，但主要都只係喺文字上對佢謾罵，滋擾程度都唔及今次咁嚴重。
阿信話尋日晏晝收到信時，見到信封啲膠水黐得好密實，已經覺得有啲唔對路，當佢用鉸剪剪開咗信封，見到入面裝有口罩時，就拿拿臨戴番手套先繼續拆信。被問到會唔會報警時，佢就話本身都幾忙，又覺得封信亦都冇恐嚇意味，加上覺得就算搵警察都未必幫到手，所以就唔會報警。
北區區議員上月接同類郵件
查實今次並唔係第一位區議員收到同類型嘅信件，就好似北區區議員林子琼上月亦曾經收過二手口罩。阿信話依家社會氣氛咁對立，選擇得從政都唔驚得咁多，但相信其實區議員都習慣咗喺開信時，都會有意識保護自己。至於阿信最後點處理呢封信？佢就話用膠袋裝好同封口後，已經將佢棄置咗喇！