政情：犯聚罰單 尹兆堅變尹兆聖

地址亦有誤 唔排除警方打錯字

肥尹尋日喺社交網站上載咗張相，仲貼文話「912室尹兆聖。查無此人」，其實係警方發畀佢有關違反禁聚令嘅定額罰款通知書，發現尹兆堅變咗尹兆聖，地址就寫咗金鐘立法會綜合大樓912室，查實肥尹嘅議員辦事處係喺911室。實際上，912室係佢嘅黨友黃碧雲嘅辦事處。

警方發出嘅定額罰款通知書，抬頭同地址錯漏百出。肥尹回覆查詢時話，雖然係錯咗名，但都知係寄畀自己嘅，佢亦冇向警方投訴，事關投訴咗都唔會有改變喎。佢估計警方應該係打速成揀錯字。

呢張定額罰款通知書，係佢同黨友喺上個月去中聯辦抗議，反對「港版國安法」時，被警方票控違反禁聚令，佢話唔會認罪，會抗辯。