政情：支咪沙沙聲 薛永恒唔知手機干擾

回應創科質詢 齋拋數字

話說薛永恒發言嗰陣，似乎因為部手機放得太近，干擾到咪高峰收音信號，雜音令到大家都有幾下聽唔清楚佢講嘅嘢。於是梁君彥就叫佢將部手機拎開啲，但薛好似都冇反應，之後仲繼續有干擾情況。薛永恒作為創科局局長，之前亦做咗差唔多三年機電工程署署長，理應好熟悉電子運作。帶頭官員嘅科技觸覺似乎都唔夠敏感，唔知係咪香港創科發展緩慢嘅原因之一呢？

講番薛永恒回應議員嘅質詢。有議員指政府投資過千億公帑支持科研發展，問薛講唔講得出，有何實質項目可以惠及民生，同促進香港經濟發展。薛永恒就搬出初創企業使用轄下嘅共享工作空間，由二○一四年大約有一千間，到去年增加至超過三千間，結果講來講去都只舉一堆數字，並無觸及實質內容。又有議員關注過去半年創科業務所受衝擊，薛就一味話防疫抗疫基金所推出嘅「遙距營商計劃」反應熱烈，未有正面回應業界嘅憂慮。