政情：傾教材編製 葉建源阻開會 葉劉發炮還擊

泛民拖延 小組至今未選主席

查實泛民陣營質疑政府打算藉住規管教科書內容，以限制學生思想、向學生「洗腦」，唔想研究幼稚園、中小學教科書及教材編製小組委員會討論有關事宜，而小組委員會成立至今開咗兩次會，都因為負責主持嘅街工議員梁耀忠故意拖延，小組委員會都仲未真正進入選主席程序，變相就唔可以開始討論相關內容。

12比12 葉劉堅稱動議無被否決

面對泛民拉布，建制派就諗盡方法應對，唔單止研究緊有冇方法褫奪梁耀忠嘅主持之位，亦嘗試繞過小組委員會，由教育事務委員會直接處理。議員張國鈞喺月初曾動議，由事務委員會召開特別會議討論教科書問題，但贊成票同反對票各得十二票，唔夠票數通過動議。作為主席嘅葉劉一度想投下贊成票，但由於主席唔可以投關鍵票，所以動議因未獲在席過半委員支持而不獲通過。

之不過，葉劉就計劃運用主席權力繼續召開特別會議，但呢個決定惹嚟民主派強烈不滿，批評佢試圖推翻表決結果，漠視委員意見，仲對佢作出強烈譴責。其中，葉建源尋日更率先發信畀葉劉，要求葉劉收回決定，更批評葉劉處事手法猶如「細路仔玩泥沙」！

喺同日下晝，葉劉就反駁話早前就係咪召開特別會議嘅動議所得嘅贊成同反對票數相同，所以呢個係並冇被否決，重申自己作為主席係有權同有責任召開特別會議。葉劉仲話過去收到好多家長關注教材與事實不符，挑起仇恨，佢指民主派平時鍾意將事情「放喺陽光下」討論，平時口口聲聲話要爭取民主，依家諮詢大家開會時間咪係民主，唔明白依家點解要恐懼討論教材編製喎。