中環出更：泛民狂拉布 圖截譴責毛孟靜議案
民主派議員經常透過積極發言、點人數等方式拉布。尋日立法會一共點咗九次人數，合共花咗一個鐘頭四十九分鐘，最終喺傍晚流會，不過主席梁君彥就決定喺今日再開番會議。
點9次人數 昨傍晚流會
尋日會議喺下午開始討論三項政府法案，包括《二○一九年職員退休計劃（修訂）條例草案》同埋《二○一九年版權（修訂）條例草案》，就喺傍晚審議緊《二○一九年版權（修訂）條例草案》嘅三讀辯論時，有民主派議員發言後要求點算法定人數，就喺大約六點半左右，梁君彥宣布因法定人數不足而流會。
喺點算法定人數期間，議員鄭泳舜就提出規程問題，話尋日多次點算法定人數，而且議程當中，有議員容海恩因為去年懷孕期間被議員毛孟靜出言侮辱嘅譴責議案，質疑到底議案能否討論。當時梁君彥就回應話，議員可以自行決定如何使用議會嘅時間，仲話提出規程問題同埋點算法定人數都係合法，其後毛孟靜就話佢哋係想盡快喺會上討論有關舊年七月二十一日喺元朗西鐵站所發生嘅無差別襲擊動議嘅專責委員會議案。
過往喺流會前一刻，都會有議員跑番入會議廳，不過喺尋日就唔見有，而流會後一眾議員都施施然咁步出會議廳，仲有唔少議員臉帶笑容，睇嚟大家都希望提早收工喎。
卓妮