中環出更：扶貧捐資抗疫 楊受成膺年度慈善家殊榮
日前喺北京舉行嘅「第十七屆（二○二○）中國慈善榜」，英皇集團主席楊受成博士獲頒「年度慈善家」殊榮，以表彰佢喺養老扶貧同捐資抗疫等慈善領域嘅突出貢獻。儘管礙於疫情，楊博士無法親赴領獎，不過佢都通過網絡視頻，向現場及網上直播嘅觀眾分享感言，指面對疫情，已克盡己力為社會作出貢獻，又展望喺慈善嘅道路上，同集團各地員工、藝人攜手前行，喺香港同內地積極開展養老事業，希望將來有更多有志者加入，共同為扶貧事業出一分力。
因應新冠肺炎疫情爆發，今年一月三十日英皇集團通過英皇慈善基金，向湖北省慈善總會及無國界社工捐贈共計一千萬元人民幣嘅醫療防護物資同捐款，以支援湖北省及香港嘅緊急防疫工作。
贈百萬套防護裝備予湖北醫護
其中包括捐贈一百二十部無創呼吸機，同一百萬套醫療防護裝備予湖北省內九個市縣十多家嚴重缺乏醫療設備嘅醫院。為保障員工嘅健康同安全，楊博士亦為香港、澳門及內地嘅前線及後勤員工，多次發放「抗疫愛心包」，傳達集團與員工共同抗疫嘅責任同信心。疫情期間，楊博士喺內地同香港捐助興建嘅十家老年中心及一家兒童福利院均嚴格執行封閉隔離等管理措施，同時配合定期消毒、分餐入戶、日測體溫等措施，目前都保持零感染。
其實早在七十年代初期，楊博士已投入慈善工作，並先後創立「英皇慈善基金」及「楊受成慈善基金」。多年來其善舉贏得各方認同，又屢獲內地頒發獎項予以表揚。喺楊博士嘅領導下，英皇集團多年來堅守「取諸社會，用諸社會」嘅宗旨，積極履行企業社會責任，回饋大眾。
至於中國慈善榜係由《公益時報》社舉辦，自二○○四年開始每年編製發布，以尋找弘揚現代公益嘅榜樣，今屆中國慈善榜「年度慈善家」僅頒發畀三位對慈善公益事業有卓越貢獻嘅企業家。
卓妮