元朗區議會主席黃偉賢今個月初被「踢爆」，佢喺元朗欖口村嘅丁屋涉嫌霸佔官地，丁屋外圍嘅前、後、左、右分別加建石磚矮牆、鐵絲網同活動鐵閘等疑作「劃界」，粗略估計霸地接近四千七百平方呎，黃偉賢尋日接受查詢時再次「認衰」，承認對霸佔官地一事知情，不過就話上個星期接到地政總署通知，已經即時拆除加建部分，依家已回復原狀。
黃解釋，約莫一年前佢細佬退休搬返嚟同佢一齊住，不過大約兩年前開始，深夜時分不時受到身份不明人士滋擾，手持鐵棍敲打丁屋門外鐵絲網，於是佢細佬就喺丁屋前門位置圍上鐵絲網同加建活動鐵閘，以緩減安全憂慮。由於佢都期望住得安心，所以並冇阻止細佬咁做，但再次承認自己要為霸官地一事負上責任。
黃又透露，佢細佬行動不便，上落樓梯無嘢扶住係行唔到，佢同地政總署反映情況後，對方話會研究係咪容許安裝欄杆，以保障出入安全。