政情：關愛通道 長者料可優先投票 曾國衞：貼心安排
去年底區議會選舉投票人數創新高，多個票站大排長龍，加上網上傳言有年輕選民在票站重複排隊，以圖促使支持建制派的長者放棄投票，故有聲音促選舉管理委員會改善問題。立法會選舉活動指引即將出爐，相信將會加入長者優先投票等建議，政制及內地事務局局長曾國衞形容呢個係貼心安排，又希望持反對意見嘅市民唔好將問題政治化。
曾國衞話，當局喺投票安排上應照顧長者、孕婦及肢體傷殘等有需要人士，讓他們優先進入票站投票，又形容情況就好似喺交通工具上嘅關愛座，及過關時嘅長者通道。佢又話，早前公眾諮詢收番嚟大多數意見都贊成設立「關愛通道」方便長者投票添！
籲勿將老人家標籤化
唔少民主派早在公眾諮詢開始時已表明反對設立「關愛通道」，擔心做法會造成不公，但曾國衞就反駁，話老人家唔一定係「藍絲」，當中亦有支持民主派嘅「銀髮一族」，強調唔好將老人家標籤化。
至於去年有個別票站容許長者優先入場引起不滿同混亂，曾認為，問題緣於票站臨時推出呢個安排，令部分市民覺得資料唔清晰所致，認為若果事先講清楚，就唔會有混亂發生喇。咁幾多歲長者先可以優先投票？曾就覺得門檻最好訂於六十五歲，但若果選管會繼續按早前諮詢咁訂於七十歲，佢都會尊重。