政情：議員掟臭彈要還 行管會追逾25萬清潔費
民主黨議員許智峯（峯鴿）、人民力量議員陳志全（慢必）及議會陣線議員朱凱廸三人，先後喺上月廿八日同今個月四日，喺立法會會議廳同會議室「掟臭彈」同「淋臭水」，破壞立法會財物。警方同消防喺嗰兩日都分別進入立法會大樓調查，其中警方話如果有足夠證據，唔排除會檢控涉事議員，雖然到依家仲未有任何拘捕行動，不過，身兼立法會行政管理委員會主席嘅立法會主席梁君彥尋日話，會向峯鴿追討五月廿八日同六月四日合共五萬二千元嘅清潔費，而慢必同朱凱廸各自就需要為六月四日嘅清潔費支付唔少於十萬元。換言之，三人合共畀人追討超過二十五萬元。
稱賠錢輕微 最壞打算坐監
梁君彥提到，行管會追收嘅費用包括更換地氈、冷氣過濾網、議員座位同保安員制服等清潔費用，慢必同朱凱廸都話唔驚被追討賠償，慢必話相比起走上街頭遊行嘅市民，議員賠錢只不過係微不足道，最壞打算係坐監。朱凱廸就認為，行管會嘅做法就係要增加議員喺議會抗爭嘅成本，佢相信遲啲亦都會有刑事檢控。至於會唔會賠錢，佢話會諮詢法律意見。
泛民破壞立會財物有前科
議員因為破壞立法會財物而被罰款其實早有前科，「示威常客」、社民連前議員梁國雄（長毛），四年前喺財務委員會上向主席台淋墨水同拋擲物品，被行管會要求支付四千八百元，作為清洗或者更換被弄污物品嘅費用。長毛更於二○一一年喺大樓啟用當日，放氣球抗議，結果被立法會秘書處罰款過萬元。
至於二○一六年捲入宣誓風波被褫奪議員資格嘅梁頌恆同游蕙禎，梁君彥話，行管會將向兩人追討大約九十三萬元嘅議員酬金同預支款項。梁君彥又提到，由於立法會舊年有巨大索償，新一份兩年合約嘅保險費用增加四倍至三百萬元。另外，立法會餐廳營運許可將會喺下月三十一日屆滿，行管會決定向餐廳批出一年短期許可證，畀餐廳繼續營運同喺招標期間，為立法會大樓使用者提供服務。