中環出更：鄉事會呻資源少 擬向徐英偉追數
鄉事委員會主要負責諮詢新界原居民對政府施政嘅意見，但唔少委員投訴話作為地區諮詢代表要照顧好多村落，但政府畀太少資源，搞到乜嘢都做唔到喎。新界鄉議局主席劉業強就話會搵民政事務局局長徐英偉「追數」喇。
鄉議局尋日召開執行委員會會議，會議上唔少委員都呻話政府畀得太少資源，仲話民選區議員可以實報實銷，但鄉事會同樣作為地區諮詢機構就唔得。各委員都要求政府重新調整機制，或者搵其他辦法資助鄉事會，仲希望劉業強約見徐英偉，睇吓有乜嘢解決辦法。
人工電費水費都要5萬
劉業強就話各鄉事會每個月只得政府萬多元資助，但鄉事會每月淨係支付秘書人工同電費水費，最少都要五萬元，一直以來都係鄉事會自行夾錢解決。劉又埋怨話香港步向城市化之後，好多鄉村被政府遺忘，加上政府理財保守，一直「冇人口嘅地方就唔做嘢」，先至搞到有啲地方愈來愈荒廢。
劉批評政府成日話要推行本地旅遊，但又冇適當發展鄉郊地區，鬧爆政府淨係睇住財政數字做嘢。劉亦承諾盡快約見徐英偉，睇吓點樣改善撥款問題。其實徐英偉上任後同區議會關係已達致「冰點」，如果鄉事會都「氹」唔掂，到時就真係麻煩喇。
卓妮