中環出更：回味做童工穿膠花 葉中賢：港工業仍有魄力
中國被喻為「世界工廠」，接收好多來自香港以至世界各地嘅訂單，但舊時香港工業發展都非常蓬勃。卓妮尋日出席歷史博物館同香港工業總會（工總）合辦嘅傳媒預展，幾位代表都分享接觸香港工業嘅情緣。
工總主席葉中賢話當年十三、四歲嗰陣，到工廠做暑期童工穿膠花，幸好當時冇乜人管，未試過「走鬼」，出糧後就用辛苦錢買雜誌、玩具。睇番依家雖然少咗「香港製造」，但認為香港喺產品開發、設計等工序仍然有優勢。而近期香港喺投入生產口罩都好快手，證明香港工業仍有魄力。而外國對中國生產嘅口罩可能欠缺信心，香港製造嘅品質比較有保證，有條件接啲防疫用品訂單嚟做。
工總副主席陳嘉賢係「廠二代」，細個過時過節都有去工廠幫手，攞吓鐵片鑄模，但主要係玩票性質同感受一下工業係咩回事。佢覺得呢啲體驗好新奇，唔只睇到製成品，仲可以見證一件產品誕生係牽涉好多工序。不過嗰陣始終係小朋友，佢最鍾意就係暑假可以去薯片、汽水廠參觀，因為有得食有得玩。
莊子雄試過攞零件自己裝
另一位工總副主席莊子雄中學嗰陣都有做暑期工，又試過攞啲電子零件返屋企組裝，後來成為興趣。而第一份糧仲用咗嚟買「Walkman」，當時都要賣幾百蚊一部，都好貴o架！不過亦係因為咁同電子結緣，大學仲揀咗讀相關科目，去到依家都係做電子行業。
歷史博物館館長張銳森帶領導賞期間都勾起唔少回憶，佢話香港啱啱有工廠生產豆奶嗰陣，一支只係要幾毫子，係牛奶價錢嘅五分之一，對於大家嚟講唔止多一個選擇，仲覺得好新奇。佢話雖然香港工業大部分北移，但仍然好支持香港工業，認為有機會發展。
卓妮