政情：美爆示威逾10日 社民連終蒲頭抗議
美國近日爆發反警暴示威，香港唔少團體亦有為事件曾發起多個示威請願。向來關注外國事務嘅社會民主連線，通常喺發生事件後都會即刻喺香港搞聲援或示威，但今次美國反警暴示威持續咗逾十日，社民連尋日先去美國駐港澳總領事館抗議，今次似乎慢咗十幾拍喎！
美領館外單膝半跪
美國黑人弗洛伊德遭白人警察壓頸致死，觸發咗連串示威抗議，社民連尋日到美國駐港澳總領事館外抗議，當中有成員喺請願期間單膝半跪，表達對事件嘅不滿。社民連秘書長吳文遠認為全世界都有類似警暴同埋嚴重種族歧視嘅問題，認為當美國人支持香港時，香港都要聲援，仲話世界應就美國嘅結構性種族歧視作出對抗。
社民連唔單止譴責警暴同蠶食群眾言論自由同集會權利，又話美國要資助警員接受強制培訓同教育，促使佢哋喺解決衝突時以溝通作為主要嘅方法。而喺集會完結後，警方向吳文遠發出違反禁聚令嘅警告，但就冇發告票。