政情：學童口罩「難產」認衰 狄志遠唔敢再寫包單
早前全城一罩難求嘅情況下，教育局引薦立法會前議員、香港家庭教育學院總監狄志遠嘅團隊同小學學界洽商，為全港資助小學提供中童口罩，而且啲學校仲畀埋訂金添！點知狄志遠啲口罩唔夠產量，只係生產咗三分之一左右，即係大約三十七萬個。有部分小學生喺今日復課，佢尋日就為事件道歉。
話香港生產面對「四無」
狄志遠早前話希望日產五至六萬個，仲話希望等復課時可照顧到有需要嘅學生。佢日前已經話口罩產量唔夠，而喺部分小學生復課前夕，佢話喺口罩生產上遇到好多困難，每日生產量唔穩定，仲形容香港在口罩生產上「無機器、無配件、無材料、無地方」。
至於點處理落咗訂嘅學校，佢就話已向資助小學校長會致歉，而退款嘅事就由校長會處理，所以唔知詳細情況。佢仲話未來會繼續生產口罩，但就唔會再保證生產數量喎。