政情：蘇錦樑話行會作反 張國鈞唔認籠裏雞
行政會議一向都係政府嘅最高決策機構，不過近年行會成員嘅表現就令人覺得同政府唱反調，曾經都係行會成員之一嘅商務及經濟發展局前局長蘇錦樑都睇唔過眼，認為行會成員如果對政策有意見就應該喺內部討論時提出，而對外就應該要協助政府向市民解釋政策。身兼行會成員嘅議員張國鈞（Horace）聞言就大呻話行會有保密制，連黨友都唔講得，所以只可以估吓黨友嘅意向，仲話反問喺保密制下，估黨友意向嘅過程有幾準呢？
蘇錦樑尋日出席座談會時就提到，有行會成員公開對新政策持相反意見，會容易令市民認為政府內部「好似有矛盾」。
講開又講，早前政府本身打算推出「禁酒令」，點知當時新民黨議員葉劉淑儀、飲食界議員張宇人等至少三名行會成員公然反對，唔少人都覺得好似「籠裏雞作反」咁。睇嚟蘇錦樑似乎暗示依班行會成員唔止唔支持政府，甚至「倒米」添。
蘇：應協助政府解釋新政策
蘇錦樑仲話，因為政府喺立法會冇投票權，所以政策需要立法會支持先可以立法，認為新政策係需要靠向議員「摸底」同埋喺政策委員會上詢問其他部門意見，認為愈早探討就愈理想。佢仲笑言，話做局長時最希望聽到嘅就係「去行會」，因為「去行會」就意味着政府各部門都支持新政策喎。同時佢認為，行會嘅功能有改善空間，要幫助推動新政策嘅同時，亦應盡能力向市民解釋。
張：保密制下要估議員意向
出席同一座談會嘅Horace，一聽完蘇錦樑嘅言論就大吐苦水，話行會有保密制，唔可以向外透露情況，但做行會成員又要向政府提供意見，同時又要估計議員會唔會支持新政策，認為喺現有嘅制度下，好難估計議員意向喎。另外，佢仲呻話政府啲措施成日話定咗日子，但好似全民派一萬蚊咁，要催多幾次、問多幾次「點解唔可以快啲？點解唔得？」政府就無啦啦快啲推行啦喎。Horace咁講法，唔知係咪想暗示政府「踢一踢先郁一郁」呢？
行會同政府有矛盾都顯而易見，Horace作為行會成員就應該要反省下。之不過，蘇錦樑以前都做過行會成員，依家冇做官就咁多偉論，點解當年又唔出聲呢！