中環出更：李漢奸：如去外國 好多國家願收留
「港版國安法」立法在即，唔少民主派人士都人心惶惶！之不過，被內地官媒炮轟為「叛國禍港四人幫」之一、外號「李漢奸」嘅民主黨（白鴿黨）創黨主席李柱銘尋日接受電視台訪問時，就話即使國安法立法後，都唔預備離開香港，但佢亦都講到，自己若果要離開香港都好容易，「就算我依家無外國嘅護照，如果我想停留喺外國，我相信好多國家都肯收我」咁話喎。
另外，李漢奸同另外十四名民主派人士喺四月中一同被捕，當時李漢奸形容自己被捕「舒服晒」。被問到係咪對年輕人內心有愧時，李漢奸直認不諱，仲講番自己因涉及一四年違法佔領行動（佔中案）而兩度被捕，但最終都未曾被當局起訴。李漢奸仲講到自己當時第二次被捕時嘅經歷，話自己已經習慣咗被捕，仲話自己喺警署內仲笑住影相添！面對今次首次被起訴，案件甚至會交由區域法院處理，李漢奸就答「坐監咪坐監囉」！
疑似後悔當年反廿三條立法
港府喺○三年曾提出就《基本法》第二十三條立法，但最終唔成功。李漢奸就話當年反對嘅原因係覺得當年條文傷及港人自由，仲話若果條文唔會削弱人權嘅話，白鴿黨當年會選擇支持咁話喎。
卓妮