中環出更：雨季來臨 郭康平住重災區早有防範
天有不測之風雲，進入夏季，颱風雨水特別多，就好似前兩日就嚟咗場黑色暴雨，令到多處地方水浸。卓妮尋日去咗香港善德基金會（基金會）舉辦嘅一個論壇，原來基金會副主席郭康平應付呢啲暴雨嘅場面好有經驗。
郭康平話住喺西貢十幾年，每逢打風落雨都係重災區，所以久而久之自己都好有經驗，前兩日紅色暴雨之後改掛黑色暴雨，呢次屋企冇乜影響。不過，佢話曾經遇過道路水浸，當時自己揸緊車，由於了解地形，估計應該冇問題，所以就揸實軚盤定速駛過，佢仲話試過颱風山竹襲港期間，廁所窗被打爛，好彩早已準備木板，於是第一時間圍封咗個窗，先可以減低損毀程度。
黃均瑜試過水浸到上心口
兩位常務副主席湯修齊同藍國慶都有出席論壇。湯修齊講咗個深刻嘅經歷，係囝囝之前去新加坡交流回港，佢去機場途中已經八號風球，等到個仔落機轉九號風球，回家途中升到十號風球，一家人喺架車上面感到左搖右擺，好彩最後有驚無險。佢話呢幾日落大雨對囝囝都係一個學習。點解咁講呀？因為囝囝已經十八歲嚟緊會去考車牌，趁呢段時間可以教佢路面情況，遇到水氹應該點樣處理，路上有雜物點樣閃避等等，都係一個唔錯嘅教學機會。
卓妮又見到基金會主席董吳玲玲同香港教育工作者聯會會長黃均瑜傾得好投契。黃均瑜憶起讀中學期間，有日放學遇着傾盆大雨，嗰陣時道路去水設計冇依家咁完善，回家途中遇到水浸，心諗應該唔係好深，誰不知行咗幾步水深就去到胸口位置，佢即刻將書包舉起，話最緊要係個書包同啲書唔好濕就得嘞，最重要嘅係佢最後都安全返到屋企。
卓妮