政情：禁聚令再延長 謝海發：食肆頭痕
本港新冠肺炎疫情反覆，政府尋日宣布延長包括限制八人以上群組聚集嘅禁聚令，以及限制食肆經營嘅防疫措施。經營飲食業嘅香港青年創業家總商會主席謝海發就話，延長防疫禁令對業界經營確有影響，特別對酒樓影響會比較大。
嘆1張30人訂單即告吹
謝海發認為市民都明白疫情仍未徹底受控，有需要維持限制群組人數嘅措施，不過預計幾日之後就會結束，所以早前就接獲八人以上群組嘅食客預訂。然而有見近日本港確診個案數字回升，有感限制措施將會延長，隨即就有一張三十人嘅訂單告吹。
查實父親節將至，今次延長防疫禁令係咪令飲食業界大失預算？謝就話唔算係大失預算嘅，但相信有小部分食店會因而捱唔住。佢又話，政府早前嘅紓困措施都算對業界起到支援作用，都希望政府喺延長禁令嘅同時可以對業界提供多啲支援。