政情：胡志偉質詢不符規程 梁君彥拒批
一般而言，立法會逢星期三舉行大會時會編訂六條口頭質詢，即係有六名議員可以就自己感興趣嘅議題，喺會上直接向官員發問。之不過，今朝舉行嘅大會只編訂咗五條口頭質詢，點解會少咗一條？原來係民主黨議員胡志偉早前作出預告嘅一項口頭質詢並唔符合規程，所以被取消。
胡志偉早前向梁君彥提出，希望喺今日大會上就「港版國安法」相關事宜向政府官員作口頭質詢，但梁前日回覆，話明白「港版國安法」備受各界關注，但認為有關法律並唔屬於港府自行管理嘅事務，而且相關法律內容仍在草擬階段，所以喺現階段決定唔批准胡提出呢項質詢。
三讀國歌法 立會料遲一句鐘休會
查實議員可以向官員面對面質詢嘅機會並唔算多，相信冇議員會希望白白冇咗發問嘅機會，但因為不設後補，所以今日大會嘅口頭質詢將會比平時少一項。順帶一提，今明兩日嘅會議將繼續進行《國歌條例草案》三讀辯論，預計分別會喺晚上八點鐘暫停同休會，較往常喺大約七點休會遲一個鐘頭。