政情：陳肇始失魂 坐錯張竹君個位
沙田瀝源邨祿泉樓出現源頭不明嘅染疫個案，本來漸見曙光嘅疫情又再度搞到人心惶惶。食物及衞生局局長陳肇始，可能因疫情反覆而搞到神不守舍，以致尋日開記者會坐錯人家嘅座位，旁人喺側邊提水佢都懵然不知呀。
被提水仍未有察覺
話說陳肇始連同衞生署以及醫管局嘅代表出席疫情個案簡報會，順便公布埋禁聚令措施既最新安排。不過唔知係咪佢太過緊張疫情，擔心市民健康定係其他原因，竟然一個唔覺意咁搞錯座位，一屁股就坐咗喺衞生防護中心傳染病處主任張竹君個位，仲要張竹君提晒水都唔察覺，搞到現場幾位醫生都好尷尬，最後簡報會要正式開始，先至臨急臨忙搬番個位，認真唔小心。其實陳肇始除咗坐錯位，亦都冇帶銅芯口罩，帶番個普通藍色嘅一次性外科口罩，種種事件真係睇到在場記者眼突突呀。