政情：憂被指偏私 建制派擬四譴責議案齊處理
立法會內務委員會被民主派「拉布」，導致停擺逾半年，經過上兩次會議成功選出正副主席後，尋日嘅會議喺泛民集體杯葛下，終於回復正常，主席李慧琼喺開會前提早進入會議室並坐喺主席位，隨後極速處理咗十六項議程，而喺處理四項同議員相關嘅譴責議案時，建制派議員周浩鼎話要先處理譴責鄭松泰同林卓廷議案，結果畀其他建制派反對，話擔心會有偏私之嫌。
泛民集體缺席內會
現時有多項譴責議員議案需要成立調查委員會跟進，內會徵詢議員意見，而尋日內會就處理四項譴責議案，當中兩項分別係公民黨郭家麒同議會陣線毛孟靜動議譴責建制派何君堯議案，亦有新民黨容海恩動議譴責熱血公民鄭松泰，何君堯動議譴責民主黨林卓廷。
期間周浩鼎提出要優先處理譴責鄭松泰同林卓廷，話林卓廷涉及舊年七二一事件，而鄭松泰則涉及舊年七月一日破壞立法會，係好嚴重嘅事情，點都要盡力處理。但就遭建制派謝偉俊、張宇人同謝偉銓反對，話今屆會期就完，建議唔好再加重秘書處工作，浪費資源浪費時間，同埋唔好畀外界有印象覺得，建制派恃人數多而針對部分議員調查喎。李慧琼就回應話秘書處都覺得動議未必可行，會再研究。
至於泛民集體冇出席內會，公民黨郭家麒話強調民主派議員難以承認李慧琼係內會主席，所以選擇杯葛會議，至於下次係咪出席就未知。