政情:立會會期將盡 六四議案料凍過水

民主派議員每年都會向立法會大會申請辯論「六四」議案,今年都唔例外,但依家大會喺傾到議員議案之前,仲有成十條政府法案同一條議員法案未處理,連今年提出申請嘅議員尹兆堅(肥尹)都打定輸數,覺得即使抽到,都未必會夠時間喺七月中嘅會期結束之前討論到喇!

抽到都唔夠時間傾

話說立法會尋日發出文件交代議員議案嘅辯論時段申請同編配,而申請喺七月八日大會討論嘅動議總共有二十個,當中包括肥尹提出嘅「毋忘六四」議案,本來抽唔抽到都要撞手神,仲要同咁多議案一齊抽,抽得中都好難,而呢次會議之後,只剩一次大會,今屆會期就會結束,睇怕都凍過水嘞!

阿尹回覆查詢時都預咗今年好大機會傾唔到喇,話「十條條例,六項辯論,得六次大會,應該點都排唔到喇」。至於會唔會同其他民主派傾吓對調議案,阿尹就覺得調都冇用,都要跟議程傾晒堆法案先。

按依家大會議程,將會討論嘅議員議案包括譴責議員毛孟靜同郭榮鏗等,問到民主派會唔會有行動對抗,肥尹就話未傾,但喺呢個時勢,唔排除用任何有效手法抗爭喎。

第一手消息請下載on.cc東網iPhone/iPad/Android/Windows Phone Apps