政情：教材小組選主席又拉布 梁耀忠主持資格或不保

被斥如郭榮鏗 圖攬炒教育

立法會內委會經過十七次會議先選到主席，負責主持嘅法律界議員郭榮鏗被建制派鬧爆有心拖延同癱瘓內會。教材小組委員會喺尋日召開第二次會議，梁耀忠喺會上繼續處理選舉程序問題，包括主席候選人係咪需要發表政綱，期間建制派議員葛珮帆（EQ）批評佢有心拖延選舉，仲直斥梁耀忠嘅做法同郭榮鏗一樣，連教育都要攬炒。

議員指不少家長投訴教材

梁志祥就話選正副主席只係需要十五分鐘時間，但依家梁耀忠花大量時間去討論一個項目，呢種主持手法令人擔心，就算花成十五個鐘都未必選到主席。佢仲反問，如果建制派議員唔發言，係咪可以即刻進行到選舉？

最近中小學嘅教材都備受爭議，EQ就認為依家教材出現問題，質疑點解立法會唔可以研究。喺教育事務委員會上倡議成立依個小組委員會嘅議員容海恩就話有唔少家長投訴教材有問題，批評話唔好樣樣嘢都話干預，而係家長關心小朋友，仲反問睇到學校提供依類教材，家長點會唔緊張呀！

民主派議員就話研究教材係非常大嘅問題，所以覺得主席同副主席候選人喺主持會議時應該要非常公道。其中人民力量陳志全就認為呢個小組委員會主席係任重道遠，關注喺剩番嘅幾星期會議上到底可以點樣聚焦討論，唔會變成批鬥大會。

被批評嘅梁耀忠就死撐，話所討論嘅嘢同選舉主席有關，自己係按過去嘅習慣處理，如果有議員認為越權，可以作出投訴。佢仲話有唔少建制派要求發言，又反駁梁志祥嘅說法好唔公道，建議佢哋唔應該發言。面對梁志祥嘅警告，梁耀忠就話唔會就範同服從，仲話無論佢寫信畀教育事務委員會主席葉劉淑儀抑或係立法會主席梁君彥，都唔會阻止添。睇嚟兩邊都企硬唔退讓，分分鐘個小組委員會又攬炒，到時真係唔知點算喇！