政情：港大三高層新任命 曾詠詩接替韋永庚任教務長
香港大學校長張翔公布三項新嘅高層人事任命，其中擔任港大教務長十八年及副教務長十年嘅韋永庚，將卸任教務長一職，其接任人係港大李嘉誠醫學院院務主任曾詠詩，其任命於七月一日生效。
至於現任社會科學院副院長謝樹基，將於九月一日起出任學生事務長；港大最後一項新任命係依家主要負責內地事務嘅入學及學術交流部總監黃依倩，六月一日起任秘書長（Chief of Staff），負責處理部門同學院之間嘅聯絡。
張翔重申，以上任命均係公開招聘後，經過招聘委員會批准，佢感謝即將卸任、於港大工作四十七年嘅韋永庚，話對方於任內給予管理層唔少明智建議，協助大家度過唔少變遷及危機。
張翔提及，候任學生事務長謝樹基擁有輔導專業背景，其研究專長係精神健康，加上對方充滿活力及為人熱誠，相信佢能夠帶領學生事務處發展，以及支持學生發展。