政情：區會謀另設秘書處 自資出糧
今屆區議會嘅爭議認真多籮籮，任期開始咗近半年，喺多區都發生過民政事務總署唔派人協助開會，又或者係有秘書處職員喺開會期間離席。中西區區議會副主席楊浩然就話，十八區區議會正副主席同埋代表曾經討論，初步建議用議員酬金另外設秘書處，去處理遭民政事務總署拒絕嘅事務。
擬自設網站上載議案紀錄
尋日中西區區議會喺會議召開前，就有幾位區議員表明會宣讀聲明，當第一位區議員於宣讀聲明觸及最近發生嘅社會事件，該區嘅民政事務專員黃何詠詩藉詞規程問題，聯同秘書及在場官員拉隊離場。之後有區議員建議，設立一個官方以外嘅網站，擺放官方網站唔會上載嘅議案、會議紀錄同埋錄音等等。
黃何詠詩後來重返會議室，就解釋話根據區議會常規，聲明唔可以同區議會職能有所牴觸，而當時亦有要求區議會主席鄭麗琼處理但被拒。礙於職能問題，冇法參與議案惟有離場。鄭麗琼就認為區議員係有宣讀聲明嘅自由，佢作為主席都無權處理，儘管雙方各持立場，但最終都冇結論。其實呢類事情近來都發生唔少，過往亦有人話過區議會只係諮詢而冇實權，依家班區議員仲諗住自掏腰包搞秘書處，睇嚟到時連秘書處都出現雙胞胎喇！