政情：許正宇黨友 葉俊廉傳做財庫局政助
政府高層上個月「大地震」，許正宇接任財經事務及庫務局局長後，楊寶蓮隨即「劈炮唔撈」從而令到該局嘅政治助理職位懸空。而近日政圈盛傳財庫局已經物色到新嘅政助人選，據講係同許正宇關係非常密切、同屬民建聯成員嘅葉俊廉。消息是否屬實，就要靜待政府嘅正式公布。
據悉，身為「九十後」嘅葉俊廉，同許正宇除咗係黨友外，兩人先後喺港交所、新世界共事過，曾負責大灣區發展項目，且有多年合作經驗，默契方面應該唔成問題，更可以話係一拍即合！翻查資料，葉俊廉曾加入政黨嘅大灣區發展小組、香港青年協會青年服務諮詢委員會等。
月薪逾三萬聘項目主任
另外，財庫局正以非公務員兩年合約形式招聘項目主任，月薪三萬零二百三十五元，申請人要持有新聞學、傳理學或政治研究學士學位，同時具備至少三年媒體、新聞、公關或者公共事務工作經驗，職責主要包括就香港、內地同國際財經事務進行專題研究同分析，提供研究支援、協助執行公眾參與嘅活動、分析社交媒體平台反映嘅民情、協助製作同設計局方社交媒體平台內容，仲有擬備演詞、刊物、宣傳物品同文稿。