政情：各界怒轟 發文護法當現身 鄭若驊快啲走人
全國人民代表大會尋日通過「港版國安法」決定草案，反對派大肆炒作，唯恐天下不亂。不過，民望長期「墊司底」、被外間炮轟為「避政司司長」的律政司司長鄭若驊並無現身解釋立法，只是五日之內三度發文當現身，尋日又喺報章撰文話，國家安全向來並唔係特區嘅自治範圍，今次訂立港版國安法及執行機制相關制訂，合符《基本法》第十八條所列明嘅國防、外交同其他依照《基本法》規定唔屬於特區自治範圍嘅法律。社會各界都鬧爆鄭經常迴避傳媒，冇勇氣向公眾做好解說法律工作，促請鄭早啲落台，係時候執包袱走人喇！
學者斥無助推動政策
香港理工大學專業及持續教育學院講師陳偉強認為，喺連場輿論戰中，鄭若驊作為主要律政官員，淨係識發表網誌或喺報章撰文，單方面傳遞「港版國安法」訊息，咁樣即係代表佢好驚面對傳媒和公眾，唔單止無互動性，亦冇辦法引起關注。陳痛斥鄭若驊辦事作風無助推動政策，建議對方倒不如早啲辭職落台，等合適人選接任。
陳又批評鄭喺國安立法上責無旁貸，唔應該再「龜縮」，因為鄭嘅官職同責任，理應係解說呢條法例最有權威性嘅聲音，按道理她比大眾更早就會知道中央政府制訂「港版國安法」一事，早作準備，親自現身為法例解說亦好應該，但鄭嘅表現卻連建制派議員都比唔上，反映鄭能力不足，寧願做「鍵盤戰士」，陳建議鄭應多啲面對公眾，以釋除市民疑慮。
「佢有佢講 冇其他人講」
時事評論員陳雲生亦指鄭若驊為部門首長，但一向甚少到立法會解答議員同傳媒問題，陳雲生直斥鄭隔空發文係「佢有佢講，冇其他人講」，仲建議鄭應該要出席區議會會議，會見更多社區團體，當面詳細解釋，唔應該只係喺網上撰寫文章，逃避責任。陳雲生認為，鄭若驊為咗自己尊嚴，應辭職問責下台，否則只會惹來市民批評。事實上，近兩屆政府近乎放棄國家安全立法，如今中央出手立法，鄭若驊仲懶懶閒歎慢板，實在難辭其咎。