中環出更：聶德權年薪140萬請人 睇實社交平台
早排畀傳媒影到做緊訪問「手震」嘅公務員事務局局長聶德權，最近透過局方刊登招聘啟事，聘請一名年薪最少有一百四十萬元嘅高級經理，為公務員事務局監督社交媒體平台，以及執行公務員事務局規定嘅其他職務。莫非係因為舊年多名公務員喺修例風波爆發期間，涉嫌參與違法活動，政府打算透過網絡打擊公務員犯法，所以聶德權急急出招，請番個人幫手打好宣傳戰？
去年多名公僕被捕
事實上，由舊年年中爆發嘅修例風波到至今，先後有多名公務員因涉嫌參與違法活動被捕，聶德權本身連位都未坐暖，上任短短一個月左右，話咁快就出招聘廣告，入面列明呢個高級經理（傳訊與協作），月薪介乎十一萬八千元至十二萬六千元，一年最少都有一百四十萬「落袋」，經驗豐富啲嘅人，年薪更高達一百五十萬元。
講番正題，呢個職位最少要具備十五年傳播、公關、新聞或相關行業嘅工作經驗，主要職責亦包括幫公務員事務局支援傳訊同對外聯繫事務、協助制訂一套全面綜合嘅傳訊與對外聯繫策略，協助與外部持份者聯絡。到底聶德權係咪真係咁冇安全感，願意豪花巨額公帑請人返嚟，睇住Facebook、Instagram等等嘅社交媒體呢？
卓妮