中環出更：邱達根想當年：去過荔園等於去過中國
喺香港經營遊樂園似乎特別困難，就連政府全資擁有嘅海洋公園亦瀕臨倒閉邊緣，莫非遊樂園不符港人生活潮流？前荔園老闆邱德根嘅孻仔，現任荔園主席嘅邱達根就覺得未必，佢話每個人都要有娛樂，而遊樂園就係休閒玩樂嘅好去處，經營得有聲有色的話，仲可以成為旅遊景點。佢話舊時嘅訪港遊客，認為要去過一趟荔園，先至等於去過中國，覺得遊樂園就係有呢啲神秘吸引力。
講到海洋公園目前嘅困境，佢話海洋公園若果幾年前搞上市，話唔定經營方面可以多啲變化。至於海洋公園有乜嘢事物令佢懷念，佢就話始終都係最愛荔園喎。
扶康會主席施家殷，都話經營遊樂園並唔容易，因為休閒玩樂嘅口味，係會隨時日而變更，今日落重本興建嘅遊樂設施，啟用之後可能過一段日子就告落伍。況且除咗園內設施，亦需其他基建如交通運輸嘅配合，投資金額相當龐大。香港嘅海洋公園雖努力吸引遊客，然而規模更大，構思更為新穎嘅遊樂園喺周邊地區陸續出現，客源方面難免被攤薄，其實內地亦有部分較老舊嘅遊樂園，亦要面對日漸劇烈嘅競爭。
林青：海洋公園唔可以長期虧損
施家殷童年時代因居於壽臣山，從而目睹海洋公園嘅落成過程，後來佢所屬嘅建築師事務所，亦有份參與園內部分設施嘅設計同興建。雖然佢對海洋公園懷有深厚感情，但是否值得年復一年咁由庫房揼水吊命，就要交由議會去決定啦。
香港福建三明聯會副會長林青，都覺得海洋公園唔可以長期虧損。佢認為與其撥款救亡，不如交由國際知名遊樂園負責經營。譬如引入大人小朋友都啱玩嘅Legoland，有趣之餘又具啟發性，業績可望轉虧為盈。
卓妮