政情：峯鴿又出騎呢招 怪聲拉布被拆穿
泛民議員喺立法會內拉布成風，經常怪招盡出，譬如包圍或佔領主席台、用大聲公高叫口號，甚至用鐵鏈將自己鎖喺座位上添。喺尋日立法會上，就有泛民議員將發聲裝置擺喺座位上，一度搞到立法會出現「嗶嗶」聲，而代主席李慧琼喺會上指，保安同秘書處確認個裝置係喺民主黨許智峯（峯鴿）嘅座位上，不過因為許不在座，所以遲啲先調查。
座位放裝置 發嗶嗶聲阻發言
話說尋日開會時，正當李慧琼處理泛民議員嘅規程問題，無啦啦出現一陣響聲，原來有議員喺座位上放咗個發聲裝置，李慧琼要求保安將裝置移走。保安隨即行埋去峯鴿個位度，嘗試拆走個裝置，點知一直都未拆得走，仲搞到其他議員唔敢發言添。
其實泛民都試過玩發聲裝置，就喺討論修改《議事規則》時亦有議員將防狼警報器鎖喺自己座位嘅櫃桶內，搞到會議暫停，甚至被驅逐離場。翻查過去嘅報道，當時峯鴿有份響起防狼警報，今次疑似故技重施，不過似乎唔成功喇。
#