政情：油費高企 陳恒鑌促免油站地價 黃錦星：做唔到

話說阿Ben覺得本港嘅油價長期高企不下，如果政府唔出手幫油價降溫嘅話，市民只可以硬食貴油，令搵食車百上加斤同增加市民嘅出行成本。佢又鬧爆政府成日用「多搭公共交通工具、少揸車」嘅交通政策做擋箭牌，但其實依家全港已有逾九成人搭公共交通工具出入，認為油價跌唔會增加市民揸車嘅誘因。

以免變相補貼私家車

阿Ben又批評高官根本唔在乎油費升跌，因為都係政府埋單，但市民就要捱約十六至十七蚊一公升嘅貴油，斥責政府漠視民情。之但係，黃錦星就完美演繹「意見接受，態度照舊」，話覺得用免地價方式批出油站用地去降低油價，有可能令政府嘅土地收入減少之餘，仲存在用公帑補貼私家車車主燃油開支嘅因素喎。把口就話政府虛心受教，其實係不予考慮囉。